მკითხველს წარმოვუდგენთ პირველ ტომს ორი ტომიდან, რომელთა საერთო სახელწოდებაა „გზის ფსიქოლოგიური ტოპოლოგია“. ავტორის ჩანაფიქრის თანახმად, „გზის ფსიქოლოგიურ ტოპოლოგიად“ წოდებული ორტომეული წარმოადგენს ლექციების კურსის, მოსამზადებელი ჩანაწერებისა და სხვა საარქივო მასალების კრებულს, რომელიც უკავშირდება მერაბ მამარდაშვილის მიერ საკუთარი ფილოსოფიური ნააზრევის „მოსაზრება-ამოთქმას“ მე-20 საუკუნის ერთ-ერთი უმნიშვნელოვანესი ლიტერატურული ნაწარმოების – მარსელ პრუსტის რომანის –  „დაკარგული დროის ძიებაში“  – საფუძველზე. მ. მამარდაშვილისთვის პრუსტის რომანი უნიკალურ სივრცეს ქმნის იმის გასაგებად, რასაც მოვლენის ფენომენოლოგია შეიძლება ვუწოდოთ.

ამ ტომში მკითხველს შეუძლია, გაეცნოს ლექციების კურსს, რომელსაც მ. მამარდაშვილი 1981-1982 წლებში კითხულობდა თბილისის სახელმწიფო უნივერსიტეტის სტუდენტებისთვის.

განყოფილებაში „არქივიდან“ პირველად ქვეყნდება 1981-1982 წლების ლექციების მოსამზადებელი მასალები, ასევე პირველად და სრული მოცულობით წარმოდგენილია მასალები, რომლებიც მ. მამარდაშვილის მიერ პრუსტის რომანთან მუშაობის უფრო ადრეულ პერიოდს უკავშირდება.

ეს გამოცემა გადამუშავებული და შევსებულია 2015 წელს წიგნის პირველ გამოცემასთან შედარებით.

ყდის გაფორმებისას გამოყენებულია ჯ. უისტლერის ნახატი „ლაგუნა ლურჯსა და ვერცხლისფერში: ლაგუნა, ვენეცია“.